Ты чакай мяне доўга...

Ваша адзнака: Нет (10 галасы)
Ты чакай мяне доўга.
Ты чакай мяне мудра і проста.
Перасіль
             і бяду,
                     і нуду,
                              і жуду.
I даруй мне маўчанне,
Даруй мне халодную ростань
I не вер прадчуванню,
Што я да цябе не прыйду.

Прылячу хворай птушкай,
Прыпаўзу прыручаным зверам,
З сэрца выкіну злосць,
                                  і сумненне,
                                                   і сум
I цябе не абражу
Мужчынскім сваім недаверам.
Я цябе на далонях у свой ранішні сон
                                                              аднясу.
Зацалую цябе,
                     зашапчу,
                                  залюляю,
Вочы ласкай напоўню,
Вусны прагай вясны запалю...

Ты чакай мяне толькі.
Ты чакай мяне.
Чуеш, малая?
Я таксама чакаю.
Таксама люблю.